اهمية الديتوكس تزداد يوم بعد يوم ، وخصوصًا في هذي الأيام من صيف ٢٠٢٠. هذا المقال جا بالتحديد عشان يعرّفك على مشروب الديتوكس، ويشجعك تكافيء نفسك بأفضل أنواعه هذا الصيف. وعشان صيف ٢٠٢٠ مختلف، خلونا نقرر نجرب أشياء مختلفة، ونتعامل مع أجسامنا بطريقة مختلفة
طريقة تحفزنا على تغيير تفكيرنا تجاه جانب من حياتنا اليومية واللي هو أكلنا
🤔 أسئلة مهمة تساعدنا في استيعاب اهمية الديتوكس
هل جربنا نتأمل عناصر الوجبات اللي نحبها ؟
وإيش أنواع الأكلات اللي نفضلها عن غيرها ؟
وإيش يخلينا نفضل هذا النوع من الأكل بالذات ؟
في الحقيقة هذي الأسئلة مهمة. ولازم نوقف عندها كثير.الوجبات اللي ناكلها تلعب دور كبير في تشكيل حالتنا النفسية، والذهنية
عاداتنا الغذائية الغير صحية استمرت لسنوات عديدة، تعودنا عليها كثير، وصرنا ما نحس بحجم المشكلة اللي تشكلت بسببها
للأسف، أكثرنا يميل للوجبات السريعة والجاهزة. ليه ؟ لأنها توفر وقت وجهد كبير وطعمها لذيذ
.بسبب هذي العادات جاءت أهمية الديتوكس. وانتشرت في السنوات الأخيرة مفاهيم كثيرة مرتبطة بالوعي الغذائي هذي المفاهيم الجديدة حفزت الناس على دراسة خياراتهم الغذائية بشكل حريص وواعي.
أحد أهم هذي المفاهيم هو ” نظام الديتوكس” اللي يعتمد على تطهير وتنقية الجسم من السموم اللي تراكمت بسبب ممارستنا لأنظمة غذائية غير صحية
☠️ اهمية الديتوكس في منع تحويل الأكل إلى سموم
كثير من الناس يعتمدون في نظامهم الغذائي على خيارات شهية مو صحية. وغالباً ما تكون هذي الخيارات عشوائية لسد حاجة الجوع أو لرغبة ملحة في تكرار النكهات والأكلات اللي نحبها بدون تفكير بمدى خطورة النتائج بعيدة المدى على أجسامنا. هذا النوع من الخيارات والأنماط الغذائية العصرية اللي يتبعها أغلب الناس تحتوي على : مواد مركبة، نسب عالية من الدهون المشبعة، منكهات صناعية ، وكميات كبيرة من السكر واللي بدورها تتسبب في تراكم المواد الضارة والملوثات في الدم والأنسجة الدهنية وتحتاج إلى وقت طويل جداً عشان يتخلص منها الجسم، هذي العملية بدورها ترهق نظامنا الحيوي الطبيعي المسؤول عن التخلص من هذي السموم وطردها واللي يتمثل في أعضاء مثل الكبد، الكليتين، الرئتين، القولون، والجلد
💪 اهمية الديتوكس في طرد السموم من الجسم
نجي الحين لطريقة عمل الديتوكس أو تنقية الجسم من السموم عن طريق النظام الغذائي وكيف نطبق هذا النظام عملياً ؟
الفكرة تتلخص في إنك تحفز وتساعد جسمك على طرد هذي السموم أو على الأقل تخفيض مستوياتها عن طريق التركيز على أنواع معينة من الخضروات والفواكه لأيام معدودة، يعني وجباتك اليومية راح تكون عبارة عن : خضروات- فواكه، ماء، عصيرات فقط، بدون أي أشياء ثانية
بهذي العملية إنت تدعم جسمك الدعم الكافي لعملية تنقية سريعة وفعالة ، لأننا مثل ما ذكرنا قبل، أجسامنا والأعضاء المسؤولة عن التطهير والتنقية تعمل بكفاءة عالية ودقة ربانية. لكن خياراتنا المتهورة في الأكل تجهد أعضائنا وتخليها تحت ضغط عالي . فاللي إنت تسويه هو إمداد جسمك ودعمه على عملية التنقية وطرد السموم بأسرع وقت ممكن
⛔ الغش ممنوع مع نظام الديتوكس
فيه أنواع كثيرة لنظام الديتوكس تقدر تجربها وتختار منها اللي يناسبك، بس تذكر،الغش ممنوع، لا تفكر تغش أبداً والتزم بنظام الديتوكس اللي حددته ووجباتك لازم ما تتعدى هذي الخيارات : خضروات، فواكه، ماء وعصيرات فقط
مدة الديتوكس متفاوتة، بعض الناس يطبقها لمدة أربعة أيام في الأسبوع وبعضهم ثلاثة أيام ، والبعض يحب يطبقها خلال الويكيند لمدة يومين بس
🥬ديتوكس الخضار
هذا النظام يعتمد على خضروات معينة ممكن تجربها على حسب رغبتك. ممكن تكون الوجبات على شكل سلطات مقطعة أو على شكل شوربات. ومن أهم الخضار اللي نتكلم عنها في هذا النوع من الديتوكس: البصل، البنجر، الثوم، الخرشوف البروكلي ، الملفوف ، الكرنب الأخضر ، اللفت . وكذلك، و براعم البروكسل.
الخضروات تقوم بدور كبير لمساعدة الكبد على عملية التنقية والتطهير من السموم
🍎ديتوكس الفواكه
الفواكه ما تقل أهمية عن الخضار ودورها مهم وفعال في إمداد الجسم بالمغذيات النباتية اللي يحتاجها وتخلي عملية الديتوكس أسرع، اختر فاكهة ( سواء طازجة أو مجمدة) ، مثل التفاح والمشمش والتوت والعنب البري والشمام والكرز والتوت البري والجريب فروت والتين والعنب.
🍹ديتوكس المشروبات
كثير يتساءلون ما هو مشروب الديتوكس ؟
مشروب الديتوكس يشمل أنواع كثيرة من العصيرات. تقدر تختار منها اللي يناسبك، من أمثلة هذي العصيرات
الأناناس و الخيار مع الليمون
الزنجبيل و الكرفس مع البقدونس
الشمندر والجزر مع الليمون
استقبل الصيف وتشجع مع خطة ديتوكس تناسبك وتخلي جسمك يبتهج
💚 اكتشف تطبيق هلا يلا، واعرف أكثر عن التطبيق الشامل المميز اللي يلبي كل الاحتياجات والأذواق